رضا کاظمی

RizaKazimi@gmail.com

 كوچه‌نين (دئنن كوچه‌ميزين،) باشينا يئتيشجَك، ديك‌دابان آياق‌قابي‌لاريني چيخاريب قونشونون زيبيل‌ قابينا آتدي. باشماق‌لاريمين سسيني كوچه‌ميزين بوتون اوغلان‌لاري تانييردي، آتماسايديم اونو، اونلارين اليندن قاچا بيلرديم هئچ؟ ال‌لريني قولتوغونا ووروب يئنيدن يولا دوشدو. آخ! ... آسفالت آياغيمين آلتيني قيديقلاييردي. اليني آغزينا آپاردي. گولمه‌ييم گليردي اؤز اؤزونه، آنجاق كوچه­میزین آدام‌لاري يوخودان آييلماسين‌لار دئيه دوداغيمي ديشله‌مه­یه مجبور اولدوم. آچيق پنجره‌لرين بيريندن سيقار اييسي گليردي. تئز دؤشلويوندن بير گيله سيقار چيخاردي. اونو، بابامين شامدان سونرا چكدييي سيقارلاريندان اوغورلاميشديم. سيقاري دوداق‌لاري‌ آراسينا قويدو. اؤزومله كيبريت گؤتورمه‌ديييم ياديما دوشدو بیردن. سیقاری ويترين­لرین كائوچو مانكن‌لرينه تاماشا ائدن بير آغانين اودویلا آليشديردیقدا، كؤتويو داها آغزيندا ياش اولموشدو. اَه، توستونو اودماميش اؤسگوردوم دالبادال. كيشي‌ گؤزونو مانكن‌لره تيكدييي حالدا گولدو. قيز اؤسگوره اؤسگوره اوندان اوزاقلاشيب اوتوبوس دوراغينداكي صندلي‌نين اوستونده اَيلشدي. بابامين سيقاريني بَيه‌نمه‌ديم. اونلارين نئجه چكديييني هئچ باشا دوشمورم، يئنه سنين سيقارلارين! سيقاريني يئره، آياغي‌نين قاباغينا آتدي. آياق ديرناق‌لاريما لاك ياخميشديم، دوز سن ايسته‌دييين قيرميزي‌لاردان. هله اوخودوغوم مدرسه­ده لاك وورماق قدغن اولماسايدي، گؤيلوم ايستردي ال ديرناق‌لاريما دا آرا بير لاك وورام. باياقدان بري دوراقدا آدديملايان بير آغا، قيزا ياخينلاشيب دئدي: سيزين آياغينيز نه قدَ‌ر گؤزل‌دير! ادبيات موعلليميميز ايدي. قيز هئچ يئريندن ترپنمه‌دي. كیلاسدا درس وئردييي كيمي، گؤز آلتي آياق‌لاريمي سوزوردو. قيز آغزي‌نين سويونو اودقونوب آياغيني او بيري آياغي‌نين اوستونه آشيردي. سيناقدا نئچه آلديغيمي سوروشماق ايسته‌ييرديم­سه، سوروشماديم آمما. كيشي ساعاتينا باخيب دئدي: ماغيل اوتوبوس بير آز گئج گلسين و من سيزي دويونجا سئير ائده بيليم. هئه! ائله‌‌بيل قاراتختا قاباغيندا چتین بیر شعری آچیقلاییردی. قيز گولدو. كئش گوللو دونومو گئييرديم، بير ده كئچن هفته مامام آلديغي كؤينه‌يي. كيشي داها دا ياخينلاشيب آياغي اوسته اَيلشدييي حالدا قيزين يئره آتديغي سيقاري گؤتوردو. ال‌‌لري‌نين بيريني قيزين ديزي اوسته قويوب سيقارا قلاب وورماغا باشلادي. آغزي‌نين يان يؤره‌سي ماتيك‌لي ايدي. اوره‌ييمده دئديم هلبت بير آز بوندان قاباق آرواديني اؤپموش، و بيردن بیره اونون هله سوباي اولدوغو ياديما دوشدو. الي قيزين آياغيني اوخشاياراق، اوتوبوس بيردن سيقنال چالدي. كيشي ديكسينيب يئريندن آياغا قالخدي. ديلي دولاشا دولاشا قيزلا ويداعلاشيب اوتوبوسا ساري گئتدي. گچ‌لي ال‌لري‌نين ايزي آياغيمين اوستونده قالميشدي. اوتوبوس یوللاناندان سونرا، قيز دا آیاقلانیب ياواش ياواش او گئدن يوللا، خيابانين قيراغييلا آددیملادی. مامام هميشه دئييردي هئچ واخت خيابانين قيراغييلا يئريمه. آغ بير مرسدس اونا يئتيشجك ساخلادي. اَه، بو اوغلان هميشه مني گؤرنده داليما دوشر. سوروجو قولاق آسديغي موزيكه آخيرينا كيمي خود وئرميشدي. ايكي اوچ دفعه سيقنال چالدي، ائله بيليردي من ده او بيري تئز آتلانيب مينن قيزلار كيمي‌يم. ايت‌جَق ده اونو سايماديم. اوغلان نسه دئييب آياغيني قازا باسدي. موزيكين سسي قويمادي نه دئديیيني آنلايام. قيز‌ خيابانين قيراغيندا دوروب‌ ماشينين ايچينه دولموش گلينجيك‌لره باخدي. پيسديك‌لي اوغلان شهر دوكان‌لارين بوتون ماتوشكه‌لريني دال صندلي‌يه ييغميشدي. ماشين اوزاقلاشديقجا، دال شوشه‌نين آرخاسينداكي قارا پيشيك قويروغونو ترپه‌ديردي، بای بای. اونو خيابانيميزين آغزيندا دوران قوجا بير چرچي ساتاردي. بو آندا، اَييليب قيچي‌نين اورتاسينا باخدي.‌ واي، يئنه آي‌باشيمين واختي يئتيشميشدي. مرسدس و اونون ايچينده‌كي گلينجيك‌لر اوزاقلاشيردي؛ جره‌ كي جهنمه! و آغ آپپاق ياتاق پالتارينا دوشموش قيرميزي لكه گئت گئده بؤيوردو. اونو اَينيندن چيخاريب گؤيه توللادي. گئجه ياريسي‌نين او واختي ايت ده خياباندا اولاميردي. پالتاري قاييديب يئره دوشمه‌دي. بير ايكي نفر گئجه‌نين قارانليغيندان باش چيخاريب اونون بدنينه باخديلار. چوخالديجا، اونو دؤوره‌له‌ييب پيچيلداماغا باشلاديلار. بوغازيم قوروموشدو. اليمي قيچيمين آراسينا آپارديقدا، اليمين ايچي قانلی ایدی. بيغي بورما كيشي‌لرين بيري اونا ياخينلاشيب يانيندان چيمديك گؤتوردو. قيز چيغيراراق، كيشي‌نين اوزونو شاپالاقلادي. كيشي‌نين ياناغي قانا بَلشدی. چيمدييين يئري گؤينه‌ييردي و من، حامامدا گؤردويوم مامامين دريسي‌نين گؤيرميش لكه‌لري ياديما دوشدو. يئكه كيشي اَييليب ال‌لريني قيزين آياق‌لارينا ساريدي. ائله اوردا ایکی قیرانلیغیم دوشدو: بونون عكسيني بابا قاب ائله‌­میش ايش ميزي‌نين اوستونه قويموشدور. اونون قديمكي دوست‌لاريندان ايدي و بابام دئيَردي قالين بيغينا گؤره بو عكسي سالديرميشيق. كيشي چيمدييين يئريني اؤپوب يالادي. بدنيم اسيردي، آياق اوسته ایسه دورا بيلميرديم. كيشي قيزي چيينينه آتيب جاماعاتين آراسيندان چيخاراندان سونرا، کادیلاک ماشينییلا اونو سايخين ­خلوت بير يئره گؤتوردو. مني ائويميزين ياخينليغينداكي پاركا آپاردي. قيزي چمن‌لرين اوستونده ياتيرديب ديل آلتي نسه دئدي. من سؤزونو ائشيتمه‌سم ده قيپ قيزارديم. كيشي تلسه تلسه شالواريني چيخاردي. بابام كيمي توكلو آياق‌لاري وار ايدي اونون. گولوب دئدي: آتان نه ايش گؤرور؟ و كؤينه‌يي، همن عكسي سالديراندان بري اَينينده قالمیش كؤينه‌يي چيخارماق ايسته‌­دیکده، ياخاسي باشيندان كئچمه‌دي. بو دؤنه من گولدوم. كؤينه‌ييني چيخارماق اوچون شيرين جانييلا اللشيردي يئكه كيشي. قيز گيزلي‌جه آياغا دوروب بارماق آياق‌لاري اوسته قاچماغا باشلادي. دؤشلويومو آچيب اونو بيردن يولوم اوسته گؤيرن آغاجين بوداق‌لاري اوسته توللاديم. كوچه‌لر، شهریمیزین دولانباج کوچه­لری بوم­بوش ايدي و جاماعات ائولرينده ایکن مني قاپي‌لاري‌نين قاباغيندان چیریل­چيلپاق كئچديييم حالدا گؤروردولر يوخولاريندا. قيز اؤز اؤزونه فيت چاليب شهرين اورتاسيندا اولان دؤرد يول آيريمينا ساري گئديردي. اوردا دوروب هر گون مدرسه­دن قاييدان باشي گؤردويوم فيتچي پوليس كيمي، دؤرد يانا باخديم. هئچ خبر يوخ ايدي. مثانه‌مين آغيرليغيني دويدوغومدان، ائله دوردوغوم يئرده اَيلشديم. هله دوزگون بوشالماميش، اوچ ياندان، ايكي گؤزلو چيراق‌لار نور سورعتييله اونا ساري يورودولر. او مات مات يئرينده­جه قورويوب قالدي. ماشين‌لار چيراق ايشيق‌لاريني منيم بدنيمه سالدیقدان سونرا، ساخلاديلار. بيرينجيسي، موعلليميميز بوتون صندلي‌لري­نین اوستونده اَيلشميش باياقكي اوتوبوس ايدي. مني ديزلري اوسته اوتوردوب قيزين دوداق‌لاريني سوموروردو. ايكينجيسي قيزين دالينا دوشن آغ مرسدس ايدي. اوغلان موزيكله اويغون ال بارماق‌لاريني آياغيما چالير، گلينجيك‌لرين هاميسي ایسه قويروق‌لاريني ترپه­ده‌رك اويناييرديلار. اوچونجوسو بابامين يولداشي، بيغي بورما كيشي‌نين قديمي کادیلاکی ايدي. لومبه­له­لوت رولون دالیندا اَیلشیب هئي بابامدان دانيشيردي بيغيني ائشه‌له‌يه ائشه­له­یه. قيز گؤزلريني يومدو. آه، من او آندا يالنيز آياق‌لاريمين آراسيندان ائويميزه، ياتاغيمين آلتينا سوزولن ساري شيريما دوشونوردوم...